යහපත් සමාජයකට……
මව් කුසක් තුළ පිළසිඳගත් කළලයක් දස මාසයක් ගෙවා දමමින් මෙම ධරණීයතලයට පිවිසෙනුයේ කිසිවක් නොදත් දරුවකු ලෙසයි.එම ඉපදෙන බිළිඳා අනාගතයේදී යහපත් හෝ අයහපත් පුරවැසියකු වීමට බලපානුයේ මෙම සමාජ තලයේම ක්‍රියාකාරකම්ය.යහපත් සමාජ තලයක එම බිළිඳා ඉපදෙයි නම් ඒකාන්තයෙන්ම යහපත් පුරවැසියකු වනු නොඅනුමානය.එහෙත් අද සමාජය දිවයන්නෙ කෙබඳු පැතිකඩක් හරහාද?
සියල්ල මුදල් මත තීරණය වන සමාජයක මනුෂ්‍යත්වය සැඟවී ගොස් ඇත.පරාර්ථය යටපත්ව ආත්මාර්ථය ඉස්මතුව ඇත.සමාජයේ අත්තිවාරම මුදල් බවට පත්ව ඇත.ගමයි පන්සලෙයි බැඳියාව බිඳී ගොස් ඇත.පොහෝ දිනකදී පන්සලට ගොස් මලක් පහනක් පුදා බුදුන් වැඳීමට මිනිස්සුන්ට අමතකව ඇත.ලොව අද විශ්ව පවුලකි.නමුත් එකී සංකල්පය තුල මව් පිය දූ දරු සබඳතා වියකී ගොස් ඇත.එබඳු වාතාවරණයක් තුළ ඉපදෙන දරුවන් යහපත් පුරවැසියන් වන්නේ කෙසේද? කකුළුවන් ඇඳේට යද්දී කකුළු පැටවුන්ට කෙළින් යන්න යැයි කීම විහිළුවකි.
එසේ නම් දෙනෙත් හැර බැලිය යුතු කාලය එළබ ඇත.අපට ලොවක් හැදිය නොහැකි බව සැබෑවකි.නමුත් තමා තුළ ගුණදහම් ගොඩ නඟා ගත හැකිය.අඳුරේ සිට අඳුරට දොස් නඟනවාට වඩා එක පහනක් හෝ දැල්විය යුතුමය.එවිට දැල්වූ පහනින් පහන් සිය දහස් ගණනක් දැල්වීමට හැකි වනු ඇත.ඔබ ඔබ තුළින්ම ලෝකය ජයගන්න උත්සකුවන්නේ නම් නිසැකවම ජයග්‍රහණයේ උරුමකරුවකු වනු ඇත.තමා තමන් තුළම ගුණදහම් ගොඩනගන්නේ නම් මුලු මහත් සමාජයම මනුෂ්‍යත්වයේ සුවදීන් සුගන්ධවත් වනු ඇත.එවිට කොළොම් තොටින් එදා නැව් නැග ගිය අපේ මිනිසත් බව යළි මේ සමාජය තුළ ස්ථාපිත වනු ඇත.ඒ මනුෂ්‍යත්වය මේ සමාජයම සුවඳවත් කරනු ඇත .
සටහන : චතුරිකා කුරේ
No comments:
Post a Comment